"Bellville" en "Victoriabaai" het voorbrand gemaak vir díe veelsydige album. Agt van die nege liedjies is samewerkings en omtrent elke een is in ’n ander genre. Om veelvuldige genres op een album te hê is niks nuuts vir Die Heuwels Fantasties nie. Ook nie om samewerkings te doen nie. Daar is tog ’n klank van rypwording vir hierdie groep wat al dertien jaar saam musiek maak. Die dromerige titelsnit is ’n samewerking met CHXRL (sanger en vervaardiger). Die samewerkings leun in die medewerker se styl in. Jack and June (Afrikaanse folk duo) bied hul country-gevoeligheid aan "Lewendig". Ettienne (sanger en pianis) vat ons na ’n vervloë era met ’n ’60s soft-rock deuntjie, "Anderkant die son". Donny Truter (ook bekend as Taleswapper) bied die enigste engelse snit. Sy kenmerkende whiskey geweekte stem maak "If you love somebody" ’n emosionele ervaring en Francois van Coke dring aan ons moet harder sit op "Maksimum Volume". C’est La Vie behoort aanklank te vind by enigiemand wat van band-georiënteerde popmusiek hou.