Stoutseun van Afrikaanse pop, Jay, het diep spore getrap met sy treffers en stout is eintlik net 'n ander term vir prettig. Maar moenie 'n fout maak nie... hy sing ook oor lewenslesse en liefde. Vir 14 jaar, as deel van boy band EDEN, was dit die een treffer na die ander. Hulle "Superhero" bly steeds een van die beste saamsing liedjies ooit. Toe volg sy solo albums en groot sukses met onder andere "Dis Hoe Ons Rol" en "So Lank Sal Ek Jou Liefhê". Tussendeur was daar duette saam met Lianie May wat so gewild, polsend en vol energie is. Van die snitte leef nou tydloos as volksbesit soos "Bonnie & Clyde", "Da Vat Hy" en "Naweeklyfie". Sy liefde vir sy land en mense is gestaaf met "Die Land" (saam met Bok van Blerk, Steve Hofmeyr, Bobby van Jaarsveld en Ruhan du Toit). Jay is 'n swaargewig in die musiek-arena en sy talente ken geen perke nie.